मांड्या (कर्नाटक) : कर्नाटकातील मांड्या जिल्ह्यातील श्रीरंगपट्टण येथील उक्कड मंदिरात दर्शनासाठी आलेल्या भाजप आमदाराच्या मुलीचा आणि कर्तव्यावर असलेल्या महिला पोलीस उपनिरीक्षकाचा (PSI) वाद झाल्याची धक्कादायक घटना समोर आली आहे. मंदिराच्या गर्भगृहात प्रवेश करण्यावरून झालेल्या वादादरम्यान आमदाराची मुलगी ऐश्वर्या गौडा हिने महिला PSI सविता पाटील यांच्या कानशिलात लगावल्याचे CCTV फुटेजमध्ये दिसत असल्याचा दावा करण्यात आला आहे. या घटनेनंतर दोन्ही बाजूंनी तक्रारी दाखल झाल्या असून, पोलिसांकडून प्रकरणाचा तपास सुरू आहे.
मिळालेल्या माहितीनुसार, १२ ऑगस्ट रोजी रात्री भीम अमावस्येच्या उत्सवादरम्यान उक्कड मंदिरात मोठी गर्दी होती. याचवेळी स्थानिक भाजप आमदार सुरेश गौडा यांची मुलगी ऐश्वर्या गौडा दर्शनासाठी मंदिरात आली होती. तिने गर्भगृहात जाऊन दर्शन घेण्याची इच्छा व्यक्त केली. मात्र, उत्सवादरम्यान सुरक्षेच्या कारणास्तव पोलिसांनी तिला गर्भगृहात जाण्यापासून रोखल्याचे सांगितले जाते.
यावरून ऐश्वर्या गौडा आणि कर्तव्यावर असलेल्या महिला PSI सविता पाटील यांच्यात वाद सुरू झाला. सुरुवातीला शाब्दिक वाद झाल्यानंतर परिस्थिती चिघळली. समोर आलेल्या CCTV फुटेजमध्ये दोघी एकमेकींसोबत वाद घालताना दिसत आहेत. त्यानंतर ऐश्वर्या गौडा यांनी महिला पोलिसाच्या कानशिलात लगावल्याचे फुटेजमध्ये दिसत असल्याचा दावा करण्यात आला आहे. त्यानंतर PSI सविता पाटील यांनीही ऐश्वर्याला प्रत्युत्तर दिल्याचे व्हिडिओमध्ये दिसत आहे.
या घटनेनंतर PSI सविता पाटील यांनी क्याथनहळ्ळी पोलीस ठाण्यात ऐश्वर्या गौडा यांच्या विरोधात तक्रार दाखल केली. ऐश्वर्या यांनी शिवीगाळ करत मारहाण केली तसेच सरकारी कामात अडथळा आणल्याचा आरोप तक्रारीत करण्यात आल्याची माहिती आहे.
तक्रार दाखल करण्यास सुरुवातीला टाळाटाळ?
दरम्यान, या प्रकरणात पोलिसांनी सुरुवातीला तक्रार दाखल करून घेण्यास टाळाटाळ केल्याचा आरोपही करण्यात आला आहे. त्यामुळे या घटनेला आणखी वेगळे वळण मिळाले. मात्र, त्यानंतर तक्रार दाखल करण्यात आली असून प्रकरणाची चौकशी सुरू आहे.
विशेष म्हणजे, ऐश्वर्या गौडा यांनीही महिला PSI सविता पाटील यांच्याविरोधात तक्रार दाखल केली आहे. त्यामुळे या प्रकरणात दोन्ही बाजूंनी तक्रारी दाखल झाल्या असून, नेमकी घटना कशी घडली, वादाची सुरुवात कशामुळे झाली आणि दोन्ही बाजूंकडून नेमके कोणते आरोप करण्यात आले आहेत, याचा तपास पोलीस करत आहेत.
आमदार सुरेश गौडा यांनी मागितली माफी
या घटनेवर आमदार सुरेश गौडा यांनीही प्रतिक्रिया दिली आहे. त्यांची मुलगी दर्शनासाठी मंदिरात गेली होती. तिने गर्भगृहात जाण्याची विनंती केली होती; मात्र पोलिसांनी तिला आत जाण्याची परवानगी दिली नाही. एका सर्कल इन्स्पेक्टरला गर्भगृहात प्रवेश दिल्याचे पाहून तिने पुन्हा विनंती केली, असे आमदार गौडा यांनी सांगितले.
यावेळी महिला पोलिसाने त्यांच्या मुलीला शिवीगाळ केल्याचे समजते. त्यानंतर दोघींमध्ये वाद झाला आणि मारामारी झाल्याचा दावा आमदारांनी केला. आपल्या मुलीने महिला पोलिसाच्या कानशिलात मारल्याचा CCTV व्हिडिओ आपण अद्याप पाहिलेला नसल्याचेही त्यांनी म्हटले.
मात्र, या घटनेबद्दल आमदार सुरेश गौडा यांनी माफी मागितली असून, घडलेल्या प्रकाराबद्दल आपल्याला वाईट वाटत असल्याचे त्यांनी स्पष्ट केले.
CCTV फुटेजमुळे प्रकरण चर्चेत
कर्तव्यावर असलेल्या महिला पोलीस अधिकाऱ्यासोबत झालेल्या वादाचे CCTV फुटेज समोर आल्याने या घटनेची कर्नाटकात चर्चा सुरू झाली आहे. विशेषतः लोकप्रतिनिधीच्या मुलीने कर्तव्य बजावत असलेल्या महिला पोलिसावर हात उचलल्याचा आरोप असल्याने या प्रकरणाकडे गांभीर्याने पाहिले जात आहे.
सध्या दोन्ही बाजूंकडून तक्रारी दाखल झाल्याने पोलिसांसमोर या संपूर्ण घटनेची निष्पक्ष चौकशी करण्याचे आव्हान आहे. CCTV फुटेज, प्रत्यक्षदर्शींचे जबाब आणि दोन्ही तक्रारींमधील आरोप यांचा तपास करून पुढील कारवाई केली जाणार आहे. त्यामुळे या प्रकरणात पोलिसांकडून नेमकी कोणती कारवाई केली जाते, याकडे आता सर्वांचे लक्ष लागले आहे.