सतना, मध्य प्रदेश: सतना जिल्ह्यात एका महिलेने तिच्या नवऱ्याला मारहाण केल्याचा व्हिडिओो सोशल मीडियावर व्हायरल झाला आहे. व्हिडिओमध्ये दिसत आहे की महिला नवऱ्यावर बुक्के मारत आहे, तर नवरा हात जोडून तिला सोडून जाण्याची विनंती करत आहे. समोर आलेली ही घटना २० मार्च रोजी दुपारी घडली असून, यात पत्नीच्या आई आणि भावाचीही सहभागिता असल्याचे आरोप आहेत.
पतीच्या तक्रारीनुसार, पत्नीकडून सतत छळ
या प्रकरणातील पीडित, लोकेश माझी, सतना रेल्वे विभागात लोको पायलट म्हणून काम करतात. त्यांनी पोलिसांना तक्रार केली आहे की त्यांच्या पत्नी हर्षिता रायकवार आणि तिच्या कुटुंबियांकडून त्यांना शारीरिक आणि मानसिक छळ सहन करावा लागत आहे. लोकेशच्या म्हणण्यानुसार, त्यांच्या लग्नानंतर (जून २०२३) पासूनच पत्नी आणि सासऱ्यांकडून पैसे आणि सोन्याच्या मागण्या सुरू झाल्या. याशिवाय, हर्षिता त्यांना घरच्यांना भेटू देत नाही, मित्रांशी संपर्क करू देत नाही आणि अनेकवेळा मारहाणही करते.
Video पहा: न्यूज 18 इंडिया यांच्या सौजन्याने
लोकेशने सांगितले की, “माझ्या पत्नीने माझ्यावर खोटे खटले दाखल करण्याची धमकी दिली आहे. ती आत्महत्येचे नाटक करून मला त्रास देत आहे.” यापूर्वीही त्यांनी पोलिसांकडे तक्रार केली होती, पण पुराव्याच्या अभावात कारवाई झाली नव्हती. म्हणूनच त्यांनी घरात छुप्या कॅमेऱ्याने व्हिडिओ रेकॉर्ड केला, जो आता प्रसिद्ध झाला आहे.
पोलिसांकडे मदतीची विनंती
लोकेश यांनी सतना आणि पन्ना येथील पोलीस अधीक्षकांना पत्र लिहून ह्या छळापासून वाचवण्याची विनंती केली आहे. पोलिसांनी त्यांना संरक्षण देण्याचे आश्वासन दिले असून, या प्रकरणी गुन्हा दाखल करण्यात आला आहे. सध्या पोलिस याबाबतचा तपास करीत आहेत.
या प्रकरणामुळे दांपत्य हिंसा आणि पुरुषांवरील घरगुती हिंसाचारावर चर्चा सुरू झाली आहे. लोकेशच्या या धाडसी पावलामुळे इतर पुरुषही अशा प्रकारच्या छळाविरुद्ध बोलण्यास प्रवृत्त होतील, अशी अपेक्षा व्यक्त केली जात आहे.