पुणे : गणेशोत्सवाच्या काळात रस्त्यांवर होणारा मोठा आवाज, DJचा वाढता वापर, ढोल-ताशा पथकांकडून होणारी वाहतूक कोंडी आणि गणेश मंडळांकडून रस्ते अडवण्याच्या प्रकारांविरोधात आवाज उठवणारे तरुण विद्यानंद बापट यांच्यावर झालेल्या हल्ल्याच्या प्रकरणाला आता वेगळं वळण मिळालं आहे. प्रसारमाध्यमांशी संवाद साधत असताना बापट यांच्यावर हल्ला करून कानशिलात लगावल्याचा आरोप असलेल्या संतोष चव्हाण याला पुणे पोलिसांनी अटक केली असून, न्यायालयाने त्याला एक दिवसाची पोलीस कोठडी सुनावली आहे.
विद्यानंद बापट यांनी गणेशोत्सवात रस्त्यावर DJ लावणे, मोठ्या आवाजात ध्वनिक्षेपकांचा वापर करणे, तसेच ढोल-ताशा पथक आणि गणेश मंडळांकडून सार्वजनिक रस्त्यांवर अडथळा निर्माण होण्याच्या मुद्द्यावर आक्रमक भूमिका घेतली होती. त्यांच्या या भूमिकेमुळे गणेशोत्सवातील ध्वनिप्रदूषण आणि सार्वजनिक रस्त्यांच्या वापराबाबत मोठी चर्चा सुरू झाली होती.
मात्र, गुरुवारी या वादाला अचानक हिंसक वळण मिळाले. प्रसारमाध्यमांशी बोलत असताना संतोष चव्हाण याने विद्यानंद बापट यांच्यावर हल्ला केल्याचा आरोप आहे. या घटनेनंतर पोलिसांनी तातडीने कारवाई करत चव्हाणला ताब्यात घेतले.
न्यायालयाकडून एक दिवसाची पोलीस कोठडी
अटकेनंतर संतोष चव्हाण याला न्यायालयात हजर करण्यात आले. न्यायालयाने त्याला एक दिवसाची पोलीस कोठडी सुनावली आहे. पोलिसांच्या माहितीनुसार, चव्हाणविरुद्ध शिवीगाळ, दमदाटी आणि मारहाणीसंदर्भात गुन्हे दाखल करण्यात आले आहेत.
या हल्ल्यामागे नेमकं कारण काय होतं, हल्ल्याचे नियोजन आधीपासून करण्यात आले होते का आणि या प्रकरणात आणखी कोणाचा सहभाग आहे का, याचा तपास पोलिसांकडून सुरू आहे.
कोण आहे संतोष चव्हाण?
विद्यानंद बापट यांच्यावर हल्ला केल्याचा आरोप असलेला संतोष चव्हाण हा पुण्यातील कोथरूड परिसरातील राऊतवाडी येथील रहिवासी असल्याची माहिती समोर आली आहे. तो एका स्थानिक बांधकाम व्यावसायिकाकडे काम करत असल्याची माहितीही समोर येत आहे. तसेच राऊतवाडी येथील प्रियदर्शनी गणेश मंडळाचा माजी अध्यक्ष म्हणूनही तो कार्यरत राहिला असल्याचे सांगितले जात आहे.
मात्र, चव्हाणचा पूर्वइतिहासही पोलिसांच्या तपासाच्या केंद्रस्थानी आला आहे. उपलब्ध माहितीनुसार, त्याच्याविरोधात यापूर्वीही मारामारी, प्राणघातक हल्ला आणि कट रचण्यासारखे गंभीर स्वरूपाचे पाच ते सहा गुन्हे दाखल असल्याची माहिती आहे.
वडिलांवरील मारहाणीचा आरोप
संतोष चव्हाणच्या हिंसक वर्तनाचा कथित प्रकार यापूर्वीही समोर आला असल्याचे सांगितले जाते. सुमारे तीन वर्षांपूर्वी त्याने आपल्या जन्मदात्या वडिलांना मारहाण केल्याचा आरोप करण्यात आला होता. या घटनेनंतर मानसिक धक्का बसलेल्या वडिलांनी संतोषशी असलेले संबंध तोडल्याची माहिती समोर येत आहे. या पार्श्वभूमीवर विद्यानंद बापट यांच्यावरील हल्ल्याच्या घटनेनंतर चव्हाणच्या पूर्वइतिहासाचीही पोलिसांकडून पडताळणी केली जात आहे.
हल्ल्यानंतर मोबाईल बंद; शहराबाहेर पळण्याच्या तयारीत?
विद्यानंद बापट यांच्यावर हल्ला केल्यानंतर संतोष चव्हाणने आपला मोबाईल फोन बंद केल्याची माहिती समोर आली आहे. त्यानंतर तो पुणे शहराबाहेर जाण्याच्या तयारीत असल्याचा संशय पोलिसांना आला. मात्र, पुणे क्राईम ब्रँचच्या पथकाने तांत्रिक विश्लेषणाच्या माध्यमातून त्याचा माग काढला. पोलिसांनी अवघ्या तीन तासांत त्याचा ठावठिकाणा शोधून काढत त्याला अटक केली, अशी माहिती समोर आली आहे.
हल्ल्यामागे नेमकं कारण काय?
विद्यानंद बापट आणि संतोष चव्हाण यांच्यातील वाद नेमका कोणत्या कारणामुळे झाला, याचा तपास आता पोलिसांकडून केला जात आहे. गणेशोत्सवातील DJ आणि ढोल-ताशांच्या मुद्द्यावरून हा हल्ला झाला का, की त्यामागे अन्य कोणते वैयक्तिक अथवा संघटित कारण आहे, याचा शोध घेतला जात आहे.
तसेच या हल्ल्याचे पूर्वनियोजन करण्यात आले होते का? संतोष चव्हाणला कोणाची साथ होती का? हल्ल्यामागे आणखी कोणाचा सहभाग आहे का? या सर्व बाबींची चौकशी पोलिसांकडून सुरू आहे. सध्या संतोष चव्हाण पोलीस कोठडीत असून, त्याच्याकडून मिळणाऱ्या माहितीनंतर या प्रकरणामागील नेमके कारण आणि संभाव्य सहकाऱ्यांची भूमिका स्पष्ट होण्याची शक्यता आहे.
दरम्यान, गणेशोत्सवातील DJ, ध्वनिप्रदूषण, ढोल-ताशा आणि सार्वजनिक रस्त्यांच्या वापराचा मुद्दा उपस्थित केल्यामुळे सुरू झालेला हा वाद आता थेट पोलीस तपासापर्यंत पोहोचला आहे. त्यामुळे या प्रकरणाच्या पुढील तपासाकडे पुणेकरांचे लक्ष लागले आहे.