गोव्यातील बेकायदेशीर मसाजवर बंदी असून पण या सेवा सुरूच आहेत

पणजी: गोवा सरकारने किनाऱ्यांवरील बेकायदेशीर मालिश सेवांवर बंदी घातली असूनही, ही सेवा अजूनही चालू असल्याचे उघडकीस आले आहे. रिव्होल्युशनरी गोवन्स पार्टीने इंस्टाग्रामवर शेअर केलेला एक व्हिडिओ सोशल मीडियावर प्रसिद्ध झाला आहे. या व्हिडिओमध्ये कळंगुट किनाऱ्यावर एक परप्रांतीय महिला पर्यटकांना मालिश सेवा देताना दिसते. हा व्हिडिओ १२ एप्रिल रोजी संध्याकाळी ७:५६ वाजता काढण्यात आला.

https://www.instagram.com/reel/DIikp7rTqWw/?igsh=Zmg5OTJ1aGRxZDlr

मुख्यमंत्री डॉ. प्रमोद सावंत यांनी अलीकडेच किनाऱ्यांवर अशा बेकायदेशीर मालिश सेवांवर बंदी घातली होती. तरीही, ही सेवा सुरू असल्याचे दिसून येते. याआधी कांदोळी किनाऱ्यावर तीन महिलांना बेकायदेशीर मालिश सेवा पुरवल्याबद्दल अटक करण्यात आली होती. त्यांना पर्यटन संचालकांच्या न्यायालयात हजर केल्यानंतर प्रत्येकी २५,००० रुपये दंड ठोठावण्यात आला होता. दंड न भरल्यामुळे त्यांच्यावर गुन्हा दाखल करण्यात आला.

कांदोळी किनाऱ्यावरील मालिश सेवेचा व्हिडिओ व्हायरल झाल्यानंतर पोलिसांनी कारवाई केली होती. स्थानिकांच्या तक्रारीनंतर सरकारने अशा सेवा देणाऱ्यांना चेतावणीही दिली होती. आता पुन्हा नवीन व्हिडिओ प्रसिद्ध झाल्यामुळे, सरकार यावर काय प्रतिक्रिया देते हे पाहणे महत्त्वाचे आहे.