मुंबई : राज्याच्या अन्न व औषध प्रशासन (FDA) आयुक्तपदाची सूत्रे स्वीकारल्यानंतर आयएएस अधिकारी तुकाराम मुंढे यांनी अवघ्या पंधरा दिवसांत राज्यभर धडक कारवाईचे सत्र सुरू करत भेसळखोर, गुटखा माफिया आणि निकृष्ट दर्जाचे अन्नपदार्थ विकणाऱ्यांविरोधात मोठी मोहीम उघडली आहे. “सुरक्षित अन्न, सुरक्षित औषधे आणि सुरक्षित महाराष्ट्र” या संकल्पनेअंतर्गत राबविण्यात येत असलेल्या या मोहिमेमुळे राज्यातील अनेक जिल्ह्यांतील अवैध व्यवसायांमध्ये मोठी खळबळ उडाली आहे.
राज्यभर मोठी कारवाई
१० जून रोजी राज्यभर एकाचवेळी राबविण्यात आलेल्या विशेष मोहिमेत ₹३.९५ कोटींचा भेसळयुक्त व प्रतिबंधित माल जप्त करण्यात आला. यामध्ये १.०७ लाख किलोहून अधिक संशयित अन्नसाठा जप्त करण्यात आला असून २१ जणांना अटक, १७ आस्थापने सील आणि १२ गुन्हे दाखल करण्यात आले. कारवाईदरम्यान अवैध वाहतुकीसाठी वापरले जाणारे वाहनही जप्त करण्यात आले.
यापूर्वी मे महिन्याच्या अखेरीस झालेल्या तीन दिवसांच्या राज्यव्यापी मोहिमेत ३३ आरोपींना अटक, २७ आस्थापने सील करण्यात आली होती. तसेच जवळपास ₹५० लाखांचा मुद्देमाल जप्त करण्यात आला होता.
जळगावात गुटखा माफिया धास्तावले
एफडीएच्या वाढत्या कारवाईमुळे जळगाव जिल्ह्यातील गुटखा विक्रेत्यांमध्ये भीतीचे वातावरण निर्माण झाले आहे. अनेक मोठ्या पानटपऱ्यांवरून गुटखा विक्री बंद करण्यात आली असून काही व्यापाऱ्यांनी आपली गोदामे आणि साठवणूक केंद्रे स्थलांतरित केल्याची माहिती समोर आली आहे. अनेक ठिकाणी गुटखा केवळ ओळखीच्या ग्राहकांनाच गुप्तपणे विकला जात असल्याचे चित्र दिसत आहे.
दूध, पनीर, तूप आणि खाद्यतेल तपासणीच्या रडारवर
जळगाव परिसरातील धरणगाव, पाळधी आणि बांभोरी भागात दुधामध्ये पामतेलासह इतर पदार्थांची भेसळ केल्याच्या तक्रारीनंतर एफडीएने दूध, पनीर, तूप, दही, खवा, मिठाई आणि खाद्यतेलांचे नमुने मोठ्या प्रमाणात तपासणीसाठी जप्त केले आहेत. जिल्ह्यातील अनेक डेअरी उद्योग सध्या एफडीएच्या रडारवर असून प्रयोगशाळेच्या अहवालानंतर पुढील कायदेशीर कारवाई केली जाणार आहे.
तेल विक्रेते आणि व्यापाऱ्यांमध्येही खळबळ
एफडीएच्या कारवाईनंतर अनेक खाद्यतेल विक्रेत्यांनी नियमांचे काटेकोर पालन सुरू केले आहे. पॅकबंद तेलामध्ये प्रमाणापेक्षा कमी तेल भरल्याच्या तक्रारीनंतर अनेक कंपन्या आता पूर्ण प्रमाणात १ लिटर, ५ लिटर आणि १५ लिटर पॅक बाजारात उपलब्ध करून देत असल्याचे दिसून येत आहे. याशिवाय सुटे तेल विक्रीवरही प्रशासनाने लक्ष केंद्रीत केले आहे.
पुढे आणखी कठोर कारवाईचे संकेत
एफडीए आयुक्त तुकाराम मुंढे यांनी स्पष्ट केले आहे की, नागरिकांच्या आरोग्याशी खेळ करणाऱ्यांना कोणतीही सवलत दिली जाणार नाही. भेसळयुक्त अन्नपदार्थ, प्रतिबंधित गुटखा, निकृष्ट दर्जाची औषधे आणि नियमांचे उल्लंघन करणाऱ्या आस्थापनांवर येत्या काळात आणखी व्यापक आणि कठोर कारवाई करण्यात येणार असून नागरिकांनीही संशयास्पद प्रकारांची माहिती प्रशासनाला द्यावी, असे आवाहन करण्यात आले आहे.