कराड: दिवंगत यशवंतराव चव्हाण यांच्या प्रेरणेतून स्थापन झालेल्या सह्याद्री सहकारी साखर कारखान्याच्या निवडणुकीत विद्यमान चेअरमन तथा माजी सहकार मंत्री बाळासाहेब पाटील यांच्या पॅनेलने २१-० अशी अभूतपूर्व विजयी फेरी मिळवली. यामध्ये विरोधी भाजप नेत्यांच्या दोन्ही पॅनेल्सना व्हाईटवॉश देण्यात आली.
सह्याद्रीच्या ‘सत्ताधाऱ्यांना’ मतदारांचा पाठिंबा
राज्यातील सहकार क्षेत्रात ‘सह्याद्री पॅटर्न’ म्हणून ओळखला जाणाऱ्या या कारखान्यावर बाळासाहेब पाटील यांचे वर्चस्व कायम आहे. गेल्या २५ वर्षांत बहुतांश निवडणुका बिनविरोध झाल्या होत्या, पण यंदा भाजपने सक्रिय विरोध केला. त्यामुळे दीर्घकाळानंतर निवडणूक लढवावी लागली. ८१% मतदान झालेल्या या निवडणुकीत जास्त मतदानाचा फायदा बाळासाहेब पाटील यांच्या पॅनेलला मिळाला.
आण्णासाहेब पाटील (तांबवे) यांनी घेतली सर्वाधिक मते
कराड, सातारा, कोरेगाव, खटाव आणि कडेगाव या पाच तालुक्यांच्या कार्यक्षेत्रातील सह्याद्री कारखान्याच्या निवडणुकीत माजी जिल्हा परिषद सदस्य आण्णासाहेब पाटील (तांबवे) यांनी विद्यमान चेअरमन पाटील यांच्यापेक्षाही अधिक मते मिळवली. दिवंगत बाळासाहेब चव्हाण (माजी कृषी सभापती) यांचे जावई असलेल्या आण्णासाहेब यांच्या नातेसंबंधांचा यशात मोठा वाटा होता.
भाजपच्या ‘मनोधैर्या’चा धूळधाण पराभव
विधानसभा निवडणुकीत बाळासाहेब पाटील यांचा पराभव करणाऱ्या भाजप आमदार मनोज घोरपडे आणि सातारा जिल्हाध्यक्ष धैर्यशील कदम यांनी स्वतंत्र पॅनेल्स उभारली होती. मात्र, दोघेही कराड तालुक्याचे नसल्याने सभासदांनी सत्ताधाऱ्यांनाच प्राधान्य दिले. त्यामुळे भाजपच्या दोन्ही पॅनेल्सना एकही जागा मिळाली नाही.
‘रयत संघटने’ची अवलक्षणीय भूमिका
माजी सहकार मंत्री दिवंगत विलासकाका उंडाळकर यांनी स्थापन केलेल्या रयत संघटनेने भाजपच्या पॅनेलला पाठिंबा दर्शविला होता. पण मतदारांनी या संघटनेकडे दुर्लक्ष करून सत्ताधाऱ्यांनाच मतदान केले. यामुळे रयत संघटनेची ‘हात दाखवून अवलक्षण’ अशी स्थिती झाली.
सह्याद्रीचा ‘अभेद्य’ इतिहास कायम
दिवंगत यशवंतराव चव्हाण आणि दिवंगत पी. डी. पाटील (माजी आमदार) यांच्या शिस्तीमुळे सह्याद्री कारखान्यात आजवर विरोधकांना प्रवेश मिळाला नव्हता. गेल्या २५ वर्षांत बिनविरोध निवडणुका होत असताना, यंदा भाजप आमदार मनोज घोरपडे यांनी सत्ता हस्तगत करण्याचा प्रयत्न केला. मात्र, त्यांना दारुण पराभव स्वीकारावा लागला.