पलूस : सांगली–सातारा स्थानिक स्वराज्य संस्था विधानपरिषद मतदारसंघाच्या पार्श्वभूमीवर राजकीय घडामोडींना वेग आला असून काँग्रेसकडून महेंद्र लाड (आप्पा) यांच्या नावाची जोरदार चर्चा सुरू झाली आहे. जिल्हा बँक, सहकार, शिक्षण आणि स्थानिक स्वराज्य संस्थांमध्ये मजबूत पकड असलेल्या लाड यांच्या उमेदवारीला पक्षांतर्गत पाठबळ मिळत असल्याची माहिती राजकीय वर्तुळातून समोर येत आहे.
या मतदारसंघाचे विद्यमान आमदार आणि ज्येष्ठ नेते मोहनराव कदम यांच्या राजकीय वारशामुळे हा मतदारसंघ काँग्रेससाठी पारंपरिक बालेकिल्ला मानला जातो. त्यामुळे आगामी निवडणुकीत पक्षाकडून सक्षम, संघटनात्मक ताकद असलेला आणि स्थानिक पातळीवर प्रभावी चेहरा पुढे करण्यावर भर दिला जात आहे. त्या पार्श्वभूमीवर महेंद्र लाड यांचे नाव आघाडीवर असल्याचे बोलले जात आहे.
महेंद्र लाड हे सहकार क्षेत्रातील अनुभवी नेतृत्व म्हणून ओळखले जातात. त्यांनी विविध सहकारी संस्थांमध्ये काम करताना संघटन कौशल्य आणि नेतृत्व क्षमता सिद्ध केली आहे. तासगाव परिसरातील सहकारी साखर कारखाने, बँका आणि शैक्षणिक संस्थांमधील त्यांचा प्रभाव लक्षणीय मानला जातो. तसेच युवक आणि शेतकरी वर्गामध्येही त्यांचे मजबूत जनसंपर्क असल्याचे सांगितले जाते.
सन १९९७ मध्ये त्यांनी तासगाव सहकारी साखर कारखान्याच्या संचालकपदापासून आपल्या राजकीय कारकिर्दीची सुरुवात केली. त्यानंतर विविध सहकारी संस्थांमध्ये त्यांनी महत्त्वाच्या जबाबदाऱ्या सांभाळल्या. कृषी, शिक्षण आणि ग्रामीण विकास या क्षेत्रांत त्यांनी केलेल्या कामामुळे त्यांची ओळख अधिक मजबूत झाली. अनेक युवकांना रोजगाराच्या संधी उपलब्ध करून देणे तसेच शेतकऱ्यांच्या प्रश्नांवर सातत्याने भूमिका मांडणे यामुळे त्यांचा जनाधार वाढत गेला.
राजकीय विश्लेषकांच्या मते, स्थानिक स्वराज्य संस्थांमधील मजबूत नेटवर्क, काँग्रेस संघटनेशी असलेली जवळीक आणि सहकार क्षेत्रातील अनुभव यामुळे महेंद्र लाड हे या निवडणुकीत काँग्रेससाठी प्रभावी उमेदवार ठरू शकतात. सांगली आणि सातारा जिल्ह्यातील अनेक पदाधिकाऱ्यांनीही त्यांच्या नावाला सकारात्मक प्रतिसाद दिल्याची चर्चा आहे.
दरम्यान, काँग्रेस पक्षाकडून अद्याप अधिकृत घोषणा झालेली नसली तरी लवकरच उमेदवारीबाबत निर्णय होण्याची शक्यता व्यक्त केली जात आहे. त्यामुळे सांगली–सातारा स्थानिक स्वराज्य संस्था मतदारसंघातील राजकीय वातावरण अधिक तापण्याची चिन्हे दिसत आहेत.