नवी दिल्ली: LPG डिस्ट्रिब्युटर्स युनियनने केंद्र सरकारसमोर वितरणावरील कमिशन किमान १५० रुपये पर्यंत वाढवण्याची मागणी केली आहे. याशिवाय, तेल कंपन्या जबरदस्तीने बिगर-घरगुती सिलिंडरचा पुरवठा करत आहेत, ज्यामुळे उज्ज्वला योजनेसह LPG वितरणात अडचणी निर्माण झाल्या आहेत, अशी तक्रार संघटनेने केली आहे. “३ महिन्यांत मागणी मान्य न झाल्यास प्रदीर्घ संप केला जाईल,” असा इशारा देण्यात आला आहे.
काय आहे मागणी?
संघटनेच्या अध्यक्ष बी. एस. शर्मा यांनी स्पष्ट केले की, सध्याचे कमिशन ऑपरेटिंग खर्चाशी जुळत नाही आणि ते किमान १५० रुपये प्रति सिलिंडर वाढवले पाहिजे. याशिवाय, ग्राहकांच्या मागणीशिवाय जबरदस्तीने बिगर-घरगुती सिलिंडर पाठवणे कायद्याच्या विरोधात आहे, हा प्रश्नही पेट्रोलियम मंत्रालयापुढे मांडण्यात आला आहे.
LPG दरात झालेली वाढ
या पार्श्वभूमीवर, ७ एप्रिल रोजी केंद्र सरकारने घरगुती LPG सिलिंडरच्या दरात ५० रुपयांची वाढ केली होती. यामुळे दिल्लीत सिलिंडरची किंमत ८०३ रुपयांवरून ८५३ रुपये, मुंबईत ८०२.५० ते ८५३.५० रुपये, तर कोलकाता आणि चेन्नईत अनुक्रमे ८२९ ते ८७९ रुपये आणि ८१८.५० ते ८६८.५० रुपये झाली आहे. उज्ज्वला योजनेतील सब्सिडीच्या सिलिंडरच्या दरातही वाढ करण्यात आली आहे.
संघटनेचा दबाव
भोपाळ येथे झालेल्या राष्ट्रीय अधिवेशनात हा निर्णय घेण्यात आला असून, विविध राज्यांतील सदस्यांनी या मागण्यांना पाठिंबा दर्शविला आहे. “सरकारने लगेच या समस्येकडे लक्ष द्यावे, नाहीतर आम्हाला कठोर पावले उचलावी लागतील,” असे शर्मा यांनी स्पष्ट केले.
सध्या पेट्रोलियम मंत्रालयाकडून या मागणीवर प्रतिक्रिया दिली गेली नसल्याने, LPG वितरक संघटनेच्या संपाची शक्यता वाढत आहे.