नवी मुंबई: नवी मुंबई आंतरराष्ट्रीय विमानतळाच्या उद्घाटनानंतर अदाणी ग्रुप नवी मुंबईत एका मोठ्या निवासी प्रकल्पाची घोषणा करणार आहे. हा प्रकल्प गुजरातमधील ‘शांतीग्राम’ प्रकल्पापेक्षा दुप्पट मोठा असेल आणि त्यासाठी अंदाजे १०,००० कोटी रुपयांची गुंतवणूक केली जाईल, अशी माहिती बिझनेस वृत्तपत्र मिंट ने प्रकाशित केली आहे.
धारावीपेक्षा दुप्पट, शांतीग्रामच्या तोडीचा
– नव्या प्रकल्पाचे नाव ‘अदाणी पनवेल’ असे ठरवण्यात आले आहे.
– सुमारे १,००० एकर जमिनीवर हा प्रकल्प विकसित केला जाईल, जो मुंबईतील धारावी पुनर्विकास प्रकल्पापेक्षा (६०० एकर) जवळपास दुप्पट मोठा असेल.
– गुजरातमधील शांतीग्राम प्रकल्प (६०० एकर) यापेक्षा हा प्रकल्प अधिक आधुनिक सुविधांसह विकसित केला जाणार आहे.
– प्रकल्पासाठी आवश्यक परवाने मिळाल्यानंतर अधिकृत घोषणा होईल.
१० हजार कोटींची रक्कम, दशकभराचा विकासक्रम
अदाणी ग्रुपने २०१० मध्ये रिअल इस्टेटमध्ये पदार्पण केले आणि अहमदाबादमधील शांतीग्राम प्रकल्प फक्त ५ वर्षांत पूर्ण केला. त्या प्रकल्पासाठी ५,००० कोटी रुपये खर्च करण्यात आले होते. नव्या प्रकल्पासाठी त्याच्या दुप्पट रक्कम (१०,००० कोटी) गुंतवली जाणार आहे आणि बांधकामासाठी जवळपास एक दशक लागू शकेल.
नवी मुंबईत वाढता रिअल इस्टेट बूम
नव्या विमानतळामुळे नवी मुंबईच्या विकासाला गती मिळत आहे. इतर बिल्डर्स देखील या भागात मोठ्या प्रमाणावर जमीन विकत घेत आहेत.
– के. रहेजा कॉर्पोरेशन होम्स जुईनगरमध्ये ५ टॉवर्सचा प्रकल्प सुरू करणार.
– गोदरेज प्रॉपर्टीज खारघरमध्ये नवीन टाऊनशिप उभारणार.
अदाणींचा हा प्रकल्प नवी मुंबईला एक नवीन ओळख देईल आणि रिअल इस्टेट क्षेत्रात मोठी चळवळ निर्माण करेल, अशी अपेक्षा आहे.