नवी दिल्ली : कॉक्रोच जनता पार्टी (CJP)च्या ‘संसद चलो’ आंदोलनाला देशभरातील विशेषत: Gen Z तरुणांचा मोठा प्रतिसाद मिळाला असून, संसदेकडे कूच करण्यासाठी हजारो विद्यार्थी, युवक-युवती आणि नागरिक राजधानी दिल्लीत दाखल झाले आहेत. राजधानीतील जंतर-मंतर परिसरासह विविध भागांत आंदोलकांची मोठी गर्दी पाहायला मिळत असून, संसद अधिवेशनाच्या पार्श्वभूमीवर संपूर्ण परिसरात कडेकोट पोलीस बंदोबस्त तैनात करण्यात आला आहे.
आंदोलनादरम्यान परिस्थिती अधिक तणावपूर्ण बनली असून, संसदेकडे जाण्याचा प्रयत्न करणाऱ्या आंदोलकांना रोखण्यासाठी दिल्ली पोलिसांनी बॅरिकेड्स उभारले. काही ठिकाणी आंदोलक आणि पोलिसांमध्ये धक्काबुक्की झाल्यानंतर अश्रुधुराच्या नळकांड्या फोडण्यात आल्या तसेच सौम्य लाठीचार्ज करण्यात आल्याची माहिती समोर आली आहे. तरीही आंदोलकांनी विविध मार्गांनी संसदेकडे जाण्याचा प्रयत्न सुरूच ठेवला.
या आंदोलनाचे नेतृत्व करणारे कॉक्रोच जनता पार्टीचे संस्थापक अभिजीत दिपके यांना दिल्ली पोलिसांनी ताब्यात घेतल्याचा दावा पक्षाचे प्रवक्ते सौरव दास यांनी केला आहे. मात्र, दिपके यांना नेमके कुठे नेण्यात आले आहे किंवा त्यांना कोणत्या कारणास्तव ताब्यात घेण्यात आले आहे, याबाबत दिल्ली पोलिसांकडून अधिकृत माहिती देण्यात आलेली नाही. त्यामुळे त्यांच्या स्थितीबाबत संभ्रम कायम आहे.
दरम्यान, आंदोलनकर्त्यांच्या मागण्यांवर चर्चा करण्यासाठी केंद्र सरकारने सीजेपीच्या प्रतिनिधींना केंद्रीय आरोग्यमंत्री जेपी नड्डा यांच्या भेटीसाठी बोलावले होते. या बैठकीला पक्षाचे प्रवक्ते सौरव दास आणि अशुतोष रांका उपस्थित होते. प्रतिनिधींनी दिलेल्या माहितीनुसार, जवळपास दोन तास प्रतीक्षा केल्यानंतर झालेली बैठक अवघ्या दहा मिनिटांत संपली. बैठकीत आंदोलनाच्या मागण्यांवर सविस्तर चर्चा झाली नसल्याचा आरोप प्रतिनिधींनी केला असून, कोणताही ठोस निर्णय किंवा तोडगा निघाला नसल्याचे त्यांनी सांगितले. त्यामुळे सरकारने केवळ चर्चेचा औपचारिक देखावा केल्याची टीका आंदोलनकर्त्यांकडून करण्यात येत आहे.
सीजेपीचे आंदोलन प्रामुख्याने परीक्षा प्रक्रियेतील कथित गैरव्यवहार, प्रश्नपत्रिका फुटीच्या घटना, विद्यार्थ्यांवरील अन्याय आणि केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीभोवती केंद्रित आहे. आंदोलनकर्त्यांच्या म्हणण्यानुसार, विद्यार्थ्यांच्या भवितव्याशी संबंधित प्रश्नांवर सरकारने ठोस भूमिका घ्यावी आणि जबाबदारी निश्चित करावी, ही त्यांची प्रमुख मागणी आहे.
आंदोलनाची तीव्रता वाढत असतानाच केंद्रीय शिक्षणमंत्री धर्मेंद्र प्रधान यांनी केंद्रीय गृहमंत्री अमित शहा यांची भेट घेतली. या बैठकीत आंदोलनाच्या पार्श्वभूमीवर चर्चा झाल्याची शक्यता वर्तवली जात असली, तरी त्यांच्या राजीनाम्याबाबत कोणतीही अधिकृत घोषणा किंवा पुष्टी करण्यात आलेली नाही.
दरम्यान, राजधानीतील परिस्थिती लक्षात घेता संसद परिसरात आणि मध्य दिल्लीतील संवेदनशील भागांमध्ये सुरक्षा व्यवस्था अधिक कडक करण्यात आली आहे. काही मेट्रो स्थानकांवरील प्रवेशद्वारे तात्पुरती बंद ठेवण्यात आली असून, अतिरिक्त पोलीस आणि रॅपिड ॲक्शन फोर्सचे जवान तैनात करण्यात आले आहेत. आंदोलनाचे पुढील स्वरूप, सरकारची भूमिका आणि अभिजीत दिपके यांच्याबाबतची अधिकृत माहिती याकडे आता संपूर्ण देशाचे लक्ष लागले आहे.