मुंबई: महाराष्ट्र पोलीस दलातील सुमारे 15 हजार रिक्त पदे भरण्यासाठी राज्य सरकारने महत्त्वाचा निर्णय घेतला आहे. मंगळवारी झालेल्या मंत्रिमंडळ बैठकीत मुख्यमंत्री देवेंद्र फडणवीस यांच्या अध्यक्षतेखाली या भरती प्रक्रियेस मान्यता देण्यात आली. यामुळे राज्यातील कायदा व सुव्यवस्था राखण्यासाठी पोलीस दलाला बळ मिळणार असून, रिक्त पदांमुळे निर्माण होणारा कर्मचाऱ्यांवरील ताण कमी होण्यास मदत होईल.
या भरती प्रक्रियेत विशेष बाब म्हणून 2022 आणि 2023 मध्ये संबंधित पदांसाठी विहित वयोमर्यादा ओलांडलेल्या उमेदवारांनाही एकवेळची संधी देण्यात येणार आहे. यामुळे अर्ज करण्यास आणि भरती प्रक्रियेत सहभागी होण्यास त्यांना संधी मिळणार आहे. ही भरती 2024 मध्ये रिक्त असलेली आणि 2025 मध्ये रिक्त होणारी पदे लक्षात घेऊन आयोजित करण्यात येणार आहे. लवकरच यासंदर्भातील जाहिरात प्रसिद्ध होण्याची शक्यता आहे.
या भरतीअंतर्गत पाच प्रकारच्या पदांसाठी एकूण 14,114 जागा भरण्यात येणार आहेत. यामध्ये पोलीस शिपाई (10,908 जागा), पोलीस शिपाई चालक (234 जागा), बॅण्डस्मन (25 जागा), सशस्त्र पोलीस शिपाई (2,393 जागा) आणि कारागृह शिपाई (554 जागा) यांचा समावेश आहे. ही पदे गट क संवर्गातील असून, ती भरण्यासाठी जिल्हास्तरावरून प्रक्रिया राबविली जाणार आहे.
भरती प्रक्रियेसाठी ओएमआर (ऑप्टिकल मार्क रेकग्निशन) आधारित लेखी परीक्षा घेण्यात येणार आहे. या प्रक्रियेत अर्ज मागवणे, अर्जाची छाननी, शारीरिक चाचणी आणि लेखी परीक्षा यांचा समावेश आहे. यासंदर्भातील सर्व अनुषंगिक प्रक्रिया राबवण्याचे अधिकार प्रशिक्षण आणि खास पथके विभागाचे अतिरिक्त पोलीस महासंचालक यांना देण्यात आले आहेत.
पोलीस दलातील शिपाई संवर्गाची पदे कायदा व सुव्यवस्था राखण्यासाठी अत्यंत महत्त्वाची मानली जातात. रिक्त पदांमुळे पोलिसांवरील कामाचा ताण वाढतो, ज्याचा परिणाम त्यांच्या कार्यक्षमतेवर होऊ शकतो. यापूर्वी उच्च न्यायालय आणि सर्वोच्च न्यायालयानेही ही पदे तातडीने भरण्याचे निर्देश दिले होते. तसेच, विधिमंडळात लोकप्रतिनिधींनीही ही मागणी सातत्याने लावून धरली होती.
पोलीस भरतीची स्वप्ने पाहणाऱ्या उमेदवारांसाठी ही मोठी संधी आहे. तज्ज्ञांच्या मते, उमेदवारांनी आतापासूनच शारीरिक चाचणी, लेखी परीक्षा आणि मुलाखतीसाठी तयारी सुरू करावी. भरतीची अधिकृत जाहिरात प्रसिद्ध झाल्यावर पात्रता निकष, आवश्यक कागदपत्रे आणि अर्ज प्रक्रिया यांची काळजीपूर्वक तपासणी करणे आवश्यक आहे.
महाराष्ट्र पोलीस दल आणि कारागृह विभागातील रिक्त पदे भरण्याच्या या निर्णयामुळे प्रशासकीय कामकाजाला गती मिळणार असून, राज्यातील कायदा व सुव्यवस्थेची परिस्थिती आणखी सुधारण्यास मदत होईल. उमेदवारांनी या संधीचा लाभ घेण्यासाठी सज्ज राहावे, असे आवाहन प्रशासनाकडून करण्यात येत आहे.